Федор Павлович Павлов – чăваш халăх культури ÿсĕмĕн кун-çулĕнче паллă йĕр хăварнă çыравçă. Вăл пултаруллă драматург, прозаик, поэт лирик, ăста композитор пулнă. Унăн «Судра» комедийĕпе «Ялта» драми пирĕн литературăра чи паллă вырăнта тăраççĕ. Федор Павлов тивĕçлипех чăваш драматургийĕпе музыка культурин никĕсне хывнă çынсенчен пĕри шутланать.

 Чăваш Республикин вĕренÿ институчĕ, Чăваш наци конгресĕн вĕренÿпе ăслăлăх комитечĕ, «Хыпар» издательство çурчĕн «Тантăш» хаçачĕ чăвашсен пултаруллă писателĕ тата ăста композиторĕ Федор Павлович Павлов çуралнăранпа 125 çул çитнине халалласа «Федор Павлов – тĕрлĕ енлĕ талант» викторина ирттерчĕ.

Викторина ăмăртăвĕ çу уйăхĕнчен пуçласа авăн уйăхĕн 29-мĕшĕччен пычĕ. Сумлă ентеш пултарулăхĕпе кăсăкланакан ачасенчен пĕтĕмпе 150 ĕç килнĕ. Пултарулăх ăмăртăвне Чăваш Республикин шкулĕсен 9-11-мĕш класĕсенче вĕренекенсем хутшăнчĕç.

Жюри членĕсем конкурса килнĕ ал çырăвĕсенчи хуравĕсене тимлĕ пăхса тухрĕç, хакларĕç. Пĕлес туртăмлă ачасем шырав меслечĕпе ĕçлесе Федор Павловăн тĕрлĕ енлĕ пултарулăх ÿсĕмне, пархатарлă ăсталăхĕн ырă енĕсене курма тата тупма пĕлнине палăртрĕç вĕсем.

Маттур ачасем викторина ыйтăвĕсен хуравĕсене библиотекăсенче тĕплĕ ларса, Интернет уçлăхĕнче тĕпчевлĕ шыраса чăнлăх тупсăмне тупни ĕçсенче тулли палăрчĕ. Викторинăна хутшăннисен ĕçĕсенче усă курнă литературăна кăтартни тата хуравсене Федор Павлов кун-çулне сăнарлакан сăн ÿкерчĕксемпе çыхăнтарса пуянлатни курăнчĕ.

Жюри викторинăна хутшăннă ачасенчен пĕр йышне, тĕпчевлĕ-шыравлă ĕçленине кура «Çамрăк тĕпчевçĕ» номинант ят пама йышăнчĕ. Çĕнтерÿçе, призерсене тата номинантсене ыйтусене чи тулли те тĕрĕс хурав панисенчен палăртрĕç.

Пирĕн шкулти Юлия Чистякова (10 класс) 3-мĕш вырăнта! Çав ятпа ăна эпир саламлатпăр.