Паян, акан 25-мĕшĕнче, И.Я. Яковлев çуралнăранпа 165, Н.В. Никольский çуралнăранпа 135 çул çитнине халалласа шкулăн акт залĕнче чăваш чĕлхи кунне халалласа савăнăçлă уяв пулчĕ. Уява шкулти чăваш чĕлхипе литературине вĕрентекен Е.А.Майков уçрĕ, пурне те çак уяпа саламларĕ. Иван Яковлевичăн пархатарлă ĕçĕн пĕлтерĕшне тата патриархăмăрпа Шупашкар районĕ мĕнле çыхăнни çинчен шкул директорĕ Геннадий Леонидович Васильев тĕплĕн каласа пачĕ, историре пулса иртнĕ событисемпе туллин паллаштарчĕ. Пухăннисене  истори факчĕсем интереслентерчĕç, краеведени материалĕсем çакна çирĕплетсе параççĕ. Шкул завучĕ Ю.Я.Петрова чăваш чĕлхине упраса хăварасси çинчен, атте-анне чĕлхи çепĕç те янăравлă пулни, тăрăшса вĕренмелли çинчен каларĕ. Малалла музыка учителĕ Валерий Егорович Кармаков ертсе пыракан кĕçĕн классенче вĕренекенсен хорĕ чăваш халăх юррисене шăрантарчĕ. Сцена çинчен чăваш чĕлхи çинчен сăвăсем янăрарĕç тата 5-мĕш классем И.Я.Яковлевăн калавĕсенчен сценкăсем выляса пачĕç. Сцена çинчех И.Я.Яковлевăн кĕнекисен выставки, ун çинчен шкул библиотекарĕ З.Н.Порфирьева тĕплĕ паллаштарчĕ. Уявра Пĕтĕм Раççейри „Чĕвĕлти чĕкеç-2013” вăйă конкурсра хастар пулнисене дипломсемпе сертификатсем, парнесем парса чысларĕç. Чи маттуррисем – Т.Яландаева (9 класс), В. Макарова (5 класс) тата Р. Чистяков (5 класс) пулчĕç.