„Камсем эпир, мĕнле йăхран эпир?

Мĕнле анне пире  савса çуратнă,

Мĕнле атте ура çине тăратнă?..

- Çĕр чăмăрĕн пĕр чĕптĕмĕ эпир,

                  Тымарсемпе тĕнче кăкне тытатпăр...”

                                             В.П.Никитин-Станьял

Шупашкар районĕнчи Кăшавăшри пĕтĕмĕшле пĕлÿ паракан вăтам шкулти вĕренекенсемпе вĕрентекенĕсем чăваш чĕлхипе литератури эрнине хатĕрленсе ирттерме нумай хатĕрленчĕç. Тĕрĕссипе каласан вăл кĕркуннеренпех тăсăлать, мĕншĕн тесен чăвашсен чи сумлă та паллă поэчĕн Ухсай Яккăвĕ çуралнăранпа 100 çул çитнине чÿк уйăхĕнче анлăн паллă турăмăр. Шкул ачисем поэтăмăрăн сăвви-поэмисемпе паллашрĕç, тĕрлĕ ÿкерчĕксем турĕç. 8-мĕш класри Петрова Шурăпа Максимова Татьяна граттаж техникипе тунă Ухсай Яккăвĕн „Ача чухнехи çăлтăрăм” автобиографиллĕ поэми тăрăх тунă сюжетлă ÿкерчĕксемпе Чăваш гуманитари институчĕ регионсем хушшинче ирттерекен наукăпа практика конференцине хутшăнчĕç. Республикăри чылай шкулсенче куçса çÿрекен выставкăна хутшăнчĕç. Çак ĕçсемпе республикăри шкул ачисем хушшинче çулсерен ирттерекен „Туслăх хĕлхемĕ” наци культурин фестивалĕнче районти тапхăрта 1-мĕш вырăн йышăнса республикăра хутшăнма тивĕç пулчĕç. Çавăн пекех  8-мĕш класри Яландаева Татьяна Степан Максимовпа Федор Павлов – чăвашсен пирвайхи композиторĕсене халалланă мультимеди презентацийĕсен конкурсĕнче 2-мĕш вырăн йышăнчĕ.

               Акан 25-мĕшĕнче, шăп та лăп Иван Яковлевич Яковлев çуралнă кун, чăваш чĕлхи кунĕнче ачасем патĕнче хăнара Чăваш Республикин тава тивĕçлĕ артистки Лариса Васильевăпа чăваш тумĕн ăсти тата дизайнерĕ Зинаида Ивановна Воронова пулчĕç. Шкулăн акт залĕнче урок тĕл пулăва чылаййăн пуçтарăнчĕç. Лариса Васильева хăйĕн кĕмĕл сассипе чăваш халăх юррисене шăрантарчĕ. Зинаида Воронова  хăй ăсталанă чăваш тумĕн капăр эрешĕсене тăхăнтартнă сакăр хĕр ача сцена çине тухсан вара зал тăвăллăн алă çупрĕ. Ара, вĕсем пурте пирĕн шкул пикисем-çке. Пĕри тепринчен илемлĕрех. Зинаида Ивановна чăннипех те ачасене ăстаçă урокне кăтартрĕ, тумсен историне тата хăй ĕçĕн технологийĕ çинчен тĕплĕн каласа пачĕ. Сцена çинче капăр  та пуян эрешлĕ, ахах мерченлĕ тумпа кĕвĕ янăранă майăн хĕрсем акăшсем пек шурĕç, илемлĕ хусканусем турĕç. Пĕр сехет хушшинче ачасем нумай çĕннине пĕлчĕç, Лариса Васильевăпа пĕрле юрларĕç. Юлашкинчен ăстасене тав туса тăвăллăн алă çупрĕç.

Чăваш чĕлхи эрнинчи мероприятисем вĕçленмен-ха, малалла пыраççĕ- вĕренекенсене тĕрлĕ викторинăсемпе ăмăртусем, интереслĕ вăйăсем кĕтеççĕ.